2008年2月13日 星期三

給我一個家......好嗎?

琴晚.....媽媽收左工...突然叫我入房話有d 野想同我傾.....

突然個心離一離.....因為次次媽咪話同我傾...都唔係好野...

今次都唔例外...開頭以為....會同我傾大肥既野....

但係我估錯了......媽咪話.....

"可能我老豆遲早同我地攤牌.....今個月唔講,下個月都會講"

我呆左一呆.....下.....咩事呀?

阿媽話唔想比2妹知道...因為佢今年重考唔想影響佢

其實老豆過左澳門做野咁耐....我都有懷疑過佢有第2個

但係佢又冇証據比我發現係....有問題

佢去左澳門做野咁耐...改變左既佢變得唔食煙.....同更著重自己既身體

反而....朋友們講既....唔拎家用,有d 唔知咩電話打黎,鬼鬼祟祟,唔番屋企....

唔番屋企就係得年初二個晚....其他時間都好少唔番

但係媽咪點解咁講.....係因為個日佢睇左老豆個袋...

發現左有d 船飛係中秋個d 時間番左hk.....但係平日黎...

我老豆係極少.....機會係零咁濟....會係平日番HK

仲要有張船飛係早上7:00....我老豆未試過係咁早走

仲有一樣就係.....係屯門友愛睇醫生.....

有咩可能一個住粉嶺既人.....會走去屯門睇醫生?

我開頭有諗過會唔會去d 專科....

但係大肥已經Band左我呢個諗法

之後媽咪話....叫我唔好洗錢洗到咁盡

真係有呢一日,會老豆轉番我個名...幫我地供埋呢一年

打後個十年我地自己攪掂佢....

聽到呢度我同媽咪一齊喊....我真係唔想睇住頭家散

從來我冇諗過我爸媽會有離婚呢一日....

阿媽話"冇左個人都唔可以冇左間屋"

點解好好地...會攪到咁....

媽咪又話之前有一次....突然番黎係隻狂鬧"你地唔係而家攤大手就有人拎錢番黎比你洗先得架,你地又唔知搵錢幾辛苦"

阿媽就覺得好大問題.....我可能成日比客鬧...都冇咩反應....

所以媽咪就覺得個女人可能迫得老豆太勁.....所以.....

但事實係咪有個女人存在到而家我地都係懷疑當中.....

唉....同媽咪傾完...我就喊唔停...大肥知我喊.....佢真係唔會哄我架-,-

大肥話如果個男人要出去玩......就唔好上身,要上身就冇得好講

如果為左個女人...唔要頭家,呢個男人都唔要得啦....

既然未成事實可必咁唔開心.....今日同Iris 傾既時候...一路打一路d 眼淚流出黎....

幾驚比同事們知道....始終唔係一件好事.....如果真係事實...我同大肥今年既曼谷之旅可能會推後........

唉......點解要咁樣....



4 則留言:

  1. 傻妹:大肥講得岩架!為左另一個女人唔要頭家既男人真係唔要得,你唔好以為佢地會變呀!呢個係男人不變既定律黎.........依家都仲未知道係唔係,你就唔好擔心咁多住喇!唸咁多都冇用架,係咪?我屋企係一個好既例子,如果你有咩唔開心、唔明,你搵我傾下囉,少少意見都可以比到你既!
     
    [版主回覆02/20/2008 15:33:00]而家一切都係估........乜都係估...

    回覆刪除
  2. 唔好咁唔開心住先啦...搞清楚件事先...唔係一陣自己嚇自己呀,有時有好多野唔係我地諗得咁差,亦有可能有好多解釋呢...
    [版主回覆02/20/2008 15:33:00]我同媽咪又要扮冇野....但係我知媽咪好擔心...成日個女人會打比佢...

    回覆刪除
  3. 冇錯,一日未證實都唔好亂諗野住.可能你老豆都係玩玩下o既啫,兩個女都未出身,個老婆又冇搵錢能力.佢唔會咁絕o既.可能你媽咪諗多咗o既啫.睇定d先.
    佢仲肯返黎同你哋過年,證明佢都仲好緊張你哋.
    [版主回覆02/20/2008 15:40:00]其實我真係冇諗到會有呢個可能性...我不嬲都係驚老豆會包2奶...始終佢真係唔做到出哂面,我都希望唔會發生...

    回覆刪除
  4. 55.都係未經證實既唔可以咁快下決斷.就算係事實,可能最後都會回手轉意呢.一日未定都會有變化嘛.
    我外父以前都試過,仲誇張到要帶個女人返屋企.但係最後都回心轉意.
    放鬆一d,唔好咁悲觀,凡事向好方面諗左先.但係千祈唔好大吵大鬧住,要冷靜面對,大吵大鬧反而會造成反効果.因為我都叫做曾經經歷過
    [版主回覆02/20/2008 15:41:00]我阿媽都係靜觀其變.....咩都係等佢會唔會做架咋

    回覆刪除

【保養】轉季補濕必備之物 ◕‿◕韓國貴婦Gobdigoun 山羊乳系列 ♪゚

韓風,由KPOP 文化到衣著同Skincare  真係係香港都買到不少由韓國引入既產品 有時覺得居於香港是件幸福事, 起碼我地想試不同國家既野,由其是美妝 加上網購既興起,真係遠在韓國既產品亦可以在網絡上購買 然而次小妹想介紹既產品,它自韓國 但...