2012年5月23日 星期三

小明&天使大囍事 ღ 第二步。倒水計劃大行動

無錯,你冇睇錯!!!!真係倒水計劃大行動~~
因為我地係母親節當日已經cfm 左2件我認為既最急切要BOOK 既野
第一件事就係Book 酒席啦,我地最終於都決定擺番始創5/F 既<帝皇庭宴會廳>
認真個句,我都係鐘意個場唔會中間有柱位,又夠光猛,裝修都算唔錯
男友又鐘意,我自己又鐘意~不過認真既菜單真係唔係算最平囉~仲要另加任飲~
不過我地既婚期都係算係旺季~真係心水既又冇哂位~
係預左揀左次選,好在係比我地搵到呢間酒樓
當有心水係呢間既時候已經搵左好多好多資料,
點知上網搵搵下見到表妹既堂家姐又係度擺過,即係問下E-MAN 拎料啦係咪先?
之後問埋表妹姨媽等等....幾個都話D送都唔錯,
個D Staff 服務又唔算係差,聽講d 雞都仲幾好wor...
不過咩都假~我個日都冇機會食野既哂氣>.<
或者你會覺得我真係好心急啦,因為之前搵左幾間我個日都比人book 哂~
所以真係好著急呢日比人拎左
所以母親節個日~我地唔陪阿媽,但係齊齊兩家人出黎見家長~同埋Book 酒席~~
不過呢日見家長有d 唔順利~真係有些少唔明我Honey 個姑姐想點...
係呢日都完完全全明白咩叫結婚已經唔係單單兩個人既事,而係兩大家族既事
大家都各有各意見,真係講到錢就睇到人性~~亦真係到呢一刻,原來我既家人真係好錫我,而我99就一句我無錢架…
當講到錢有陣時你覺得佢好好既親人都會變哂樣…
Btw…我地兩個都想自己攪得掂呢個婚禮啦,今次跟我地既婚宴係高經理,你話佢係咪好好就各花各眼啦,著數都有比下咁啦,叫做好好就唔敢多講…不過酒席真係好貴>_<高生話既然都預有廿五圍,不如直接包場啦,都係廿七圍咋,老豆就好豪咁話一於就包場啦唔好間黎間去咁肉酸,我同honey都覺得無咁既必要不過老豆出到聲費時即時band佢啦,傾埋酒菜比埋訂金,當奶奶問阿媽過大禮個陣,媽咪就想話起碼都會海味四樣咁,但係奶奶就話我啲同事話用利是代替就ok啦…媽咪個樣即刻黑哂,見完之後又比奶奶同姑姐捉住,又話洗唔洗要咁多圍又話洗唔洗咁多禮金又話洗唔洗買金比我…
即時覺得好煩好頭痛我覺得點解要搵我做磨心呢真係?或者始終我都係女家~如果比著我都覺得阿媽已經好退讓~
雖然佢拎我好多圍但係我知佢真係有付出比我地,真係好苦惱呢~~~
都比大家望下我揀左酒棲係咩樣~又比下意見係唔係真係揀得過先???
首先望望個門口先~~~個門口就有幅油畫係度~~不過上網話好似好娘咁~~如果可以掛多張海佈出黎就好啦~~
如果到時冇人拎場呢~~左面就唔會有界開個位~而家我地就會係右邊面入去~~


一入門右邊既地方就會係簽到位啦~但係到時係咩樣~真係唔敢講啦...希望唔好太肉酸啦~


另外我地既排位就係面前既兩行啦~就可以擺到20圍左右~雖然樓底唔高但係最重要冇柱先~
如果加多過25圍呢~就會擺係最左面既地方啦~~



將會切既假結婚蛋糕~~


另外個台就係咁架啦~呢個佈置對比我第一次睇場個陣轉左~有我最愛既紫色~同埋唔係好花~
唔知第時我既外景會係點架呢?我問左高生架啦~佢話一定係米色架啦~所以唔洗擔心會撞衫~~



當然要睇我最著緊既新娘房啦~~呢個新娘房真係好大~擺多圍木台都得Wor...
廁所又係舊公司有份做wor...唔知可唔可以搭單叫佢做好d 呢xdd
化妝木台個鏡反而細左d 但係高生話我到時想點都得~
因為當日有人打緊牌呀~我都唔好意思影人地相~~連個衣櫃都好大~又有電視~~都係唔錯既


呼~~~~攪掂好酒席就係時候要攪攝影啦~最後我地都決定去番純美新娘度算啦
雖然小寶呢個皇牌一早比人Book 左,但係我都揀左另一個比較出名既攝影師<雷強>,錄影就係Benny,Shap Photo 就係阿史啦~~
而家仲諗緊搵唔搵呢間幫我地做埋即影派相~價錢真係完全唔貴~約$2000蚊350張相,但係一個問題就係...佢唔包卡
呢d 問題出年再諗啦...唔想煩住


呢日倒水行動~終算攪左兩樣最重要既問題,黎緊就係搵化妝,
租衫同埋Book 婚沙相啦~~~~
希望一切成成功功啦~~







3 則留言:

  1. 恭喜呀 ^^

    睇完成篇(好長) haha
    講錢失感情, 最好搵番自己個仔做磨心喇 (唔明點解係你做囉)
    嫁女麻, 點都唔可以失體, 過大禮既禮物係代表男家的心意, 有時唔可以用錢去取代架麻

    有乜野要diy或者有咩問題, 唔駛同我客氣 hoho~~~~ ^^
    (最好問定阿媽想要乜海味, 然後叫bf通知你奶奶要買d乜)
    [版主回覆05/28/2012 11:24:06]我想問下你,如果我拎D 公仔比你加工又得唔得
    大約又幾多錢左右呀?
    你send 貓貓比我( man_man811@yahoo.com.hk)
    花球我想要呀~但係我未睇哂你整既,係唔係絲花黎架?
    [葉子‧Mabel回覆05/28/2012 11:16:57]係咁架la, 咩都要用錢...佢地又怕自己洩低咋~~~
    diy 自己上網再搵下教學就無難度了
    希望有d咩, 都你地兩個自己做晒.... 以免傷和氣 ^^
    [版主回覆05/28/2012 10:28:35]嘻嘻~~真係完係估唔到有人會睇我呢D 又長又多字既文XDD
    我打個陣真係想發洩架咋...因為真係好忟呀,咁想點o者係咪先
    而家佢姑姐仲話我地d 酒席點解咁貴....其實都係6xxx....好幾個朋友都話算抵啦
    佢仲要話佢問佢d 同事都係4-5千蚊左右咋嗎,又話點解唔係觀塘擺要係太子擺~
    又係咁話係唔係真係要25圍咁多呀,你屋企有冇咁多親戚呀,你阿媽請埋D 朋友黎唔黎架....一陣唔黎又乜乜乜....攪到我真係有D 痴線...-口-
    我阿媽講左咩冬茹半斤,2"官"鮑魚,咩半斤花膠仲有唔知咩野,好似咩生果盤同西餅個D 卦~唔記得啦...我諗唔會同99 講,同佢講1定又話我食左佢個仔隻車=口=
    情願叫我男友自己買就算=口=煩死....真係
    都唔明點解結個婚要咁煩...人都癲~姑姐又話奶奶要著褂WOR...大佬有冇諗過租衫錢我地比架~你又著褂做乜先

    呷完一輪XDD 講番正題先XDD多謝你話會肯幫我DIY 呀
    其實我之前有一札Kitty 公仔花,我想拆左佢地出黎做襟花,同手花~但係我完全唔識整-口-同埋整筆都係唔知點整-口-
    租車又係一個問題...>.<我有諗過不如租巴士~但係唔知好唔好

    回覆刪除
  2. 同意...真係倒水咁倒....>.<"
    [版主回覆06/18/2012 00:27:43]我地已經倒到好驚...而家係儲緊錢埋酒席~~
    不過都要恭喜你成為何太啦XDD

    回覆刪除
  3. 我都覺得倒水咁,同埋壓力勁大,咁大個女第一次簽張幾萬蚊ga 卡數!!!wahahha!~
    [版主回覆10/30/2012 15:44:21]而家倒完一輪~到而家停一停出年再倒~
    你幾時大婚?

    回覆刪除

【Hugo成長日記】率先了解小孩的天賦潛能 ❤ 22Plus Talent Test (測試篇) 。★。

因乜解究Hugo 又要睇醫生? 仲要睇個咁靚既姐姐? 非也非也,Gogo 近來身體都暫時不錯, 係試過d 流下鼻水少少打咳次咁者 也許而家時代唔同,科技亦比之前更加唔同 好似之前唔會知道陀住既小朋友會唔會有唐仕既基因 而好似我之前亦因為係政府醫院...